រដ្ឋាភិបាលកម្ពុជាគ្រោងនឹងដាក់សំណើការទូតមួយនៅដើមសប្តាហ៍ក្រោយ នេះឲ្យរដ្ឋាភិបាលថៃលុបចោលវ៉ឹបសាយថ៍ដែលសរសេរថា ទឹកដីខ្មែរបច្ចុប្បន្នមួយចំនួនជារបស់ថៃដែលបានបាត់បង់។ អ្នកនាំពាក្យរបស់ក្រសួងការបរទេសនៃប្រទេសកម្ពុជា លោក កុយ គួង មានប្រសាសន៍នៅថ្ងៃទី១១ កក្កដា ថា រដ្ឋាភិបាលខ្មែរបានច្រានចោលការសរសេរនៅក្នុងវ៉ឹបសាយថ៍របស់ថៃ ថាជាការកែប្រែបំភ្លៃប្រវត្តិសាស្ត្រទាំងស្រុងនិងជាការញុះញង់ បញ្ឆេះកំហឹងប្រជាជននៃប្រទេសទាំងពីរផងដែរ។
លោក កុយ គួង បានមានប្រសាសន៍ថា ៖ «គេបានបញ្ជាក់ថា គេបានបាត់បង់ទឹកដីទៅលើប្រទេសជិតខាងហ្នឹង ហើយក្នុងនោះគឺប្រទេសជិតខាងនោះមានកម្ពុជាផងដែរ ថាថៃបានបាត់បង់មកលើប្រទេសយើង។ ដូច្នេះចំណុចនេះគឺយើងមិនអាចទទួលយកបានទេ យើងនឹងធ្វើអត្ថបទមួយបញ្ជាក់ ក្រសួងការបរទេសនឹងទាត់ចោលអំពីការលើកឡើងនៅក្នុង Video Clip នេះ ព្រោះវាជារឿងផ្ទុយនឹងប្រវត្តិសាស្ត្រ។ ប្រវត្តិសាស្ត្រពិតនោះគឺថា ខ្មែរយើងទេដែលបាត់បង់ទឹកដីទៅខាងប្រទេសនោះ»។
សូមជម្រាបថា កាលពីពេលថ្មីៗនេះវ៉ឹបសាយថ៍ថ្មីមួយរបស់នាយករដ្ឋមន្ត្រីថៃឈ្មោះ www.ilovethailand.org បានសរសេរទាមទារថា ផ្នែកមួយចំនួននៃប្រទេសកម្ពុជាគឺជាទឹកដីថៃដែលបានបាត់បង់។ វ៉ឹបសាយថ៍ដដែលនោះបានបង្ហាញនូវវីដេអូថា ផ្នែកខ្លះនៃទឹកដីកម្ពុជាបច្ចុប្បន្ន រួមមានខេត្តបាត់ដំបង ខេត្តសៀមរាប និងតំបន់ជម្លោះនៅប្រាសាទព្រះវិហារ គឺជាទឹកដីថៃដែលបាត់បង់។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានអះអាងថា ការសរសេរបង្ហោះតាមវ៉ឹបសាយថ៍បែបនេះបានបញ្ជាក់ពីមហិច្ឆតាលោភលន់មួយ ទៀតរបស់ថៃ ដែលកម្ពុជាមិនអាចទទួលយកបាន។
លោក រ៉ុង ឈុន បានបញ្ជាក់ថា ៖ «ជុំវិញវ៉ឹបសាយថ៍របស់សៀមដែលបាន ផ្សព្វផ្សាយ ឃើញថាជាការបំភ្លៃប្រវត្តិសាស្ត្រ។ យើងដឹងហើយ សៀមមានមហិច្ឆតាចង់តែបានទឹកដីកម្ពុជាទេ»។
នៅថ្ងៃសៅរ៍ចុងសប្តាហ៍នេះវិទ្យុអាស៊ីសេរីមិនអាចសុំការបំភ្លឺ ពីមន្ត្រីស្ថានទូតថៃជុំវិញបញ្ហាខាងលើនេះបាននៅឡើយទេ។
សាស្រ្តាចារ្យប្រវត្តិសាស្ត្រខ្មែរនៃសកលវិទ្យាល័យភូមិន្ទភ្នំពេញ លោក សំបូរ មាណ្ណារ៉ា មានប្រសាសន៍ថា កាលពីសម័យចក្រភពអង្គរខ្មែរ ទឹកដីខ្មែរបានលាតសន្ធឹងដល់ប្រទេសភូមានិងលាតសន្ធឹងដល់ប្រទេស ចិន ព្រមទាំងប្រទេសម៉ាឡេស៊ីសព្វថ្ងៃនេះផងដែរ។
អ្នកប្រវត្តិសាស្រ្តដដែលបញ្ជាក់ថា តាំងពីសម័យរុងរឿងរហូតមកដល់បច្ចុប្បន្ននេះ កម្ពុជាបានបាត់បង់ទឹកដីដ៏ច្រើនលើសលុបតាមការដណ្តើមយករបស់ប្រទេស ថៃនិងប្រទេសវៀតណាម។
ប្រវតិ្តនៃការសាងសង់ប្រាសាទព្រះវិហាររបស់ខ្មែរ
បើតាមសៀវភៅប្រវត្តិសាស្រ្តខ្មែរមួយចំនួនដែលក្នុងនោះមានទាំង សរសេរដោយ លោក អាល់បែរ ឡឺបោននឺ និងលោក ក្លូដហ្សាក់ ជនជាតិបារាំង បានឲ្យដឹងថា ប្រាសាទព្រះវិហារត្រូវបានស្ថាបនាឡើងនៅក្នុងដែនដីខ្មែរ សាងសង់ពីថ្ម ចាប់តាំងពីរជ្ជកាលនៃព្រះបាទ សុរ្យវរ្ម័នទី១ នៅពាក់កណ្តាលទី១នៃសតវត្សរ៍ទី១១មកម៉្លេះ។
បានន័យថា ប្រាសាទព្រះវិហារត្រូវបានស្ថាបនាឡើងក្នុងគ្រាដែលស្រុកខ្មែរមាន ផ្ទៃដីធំធេង មានរួមទាំងខេត្តបាត់ដំបងនិងខេត្តសៀមរាបផង គឺដីខ្មែរលាតសន្ធឹងរហូតដល់ប្រទេសភូមា ខាងជើងទៅដល់ទីក្រុងវៀងច័ន្ទនៃប្រទេសលាវ។ ចំណែកប្រទេសថៃសព្វថ្ងៃពុំទាន់មានទេនាកាលណោះ ហេតុនេះហើយទើបព្រះមហាក្សត្រខ្មែរសង់ប្រាសាទព្រះវិហារបែរមុខទៅ ទិសខាងជើង ព្រោះដីខ្មែរនោះមានទីទំនាប ងាយធ្វើជណ្តើរឡើង ប្រសើរជាងដីនៅទិសខាងត្បូងដែលមានជញ្ជាំងភ្នំចោទខ្ពស់ពេក។
លោកសាស្រ្តាចារ្យ ឃិន សុខ ធ្លាប់បង្រៀនជាច្រើនឆ្នាំអំពីប្រវត្តិសាស្រ្តខ្មែរ ថៃ លាវនិងភូមា នៅឯវិទ្យាស្ថានជាតិអ៊ីណាល់កូ នៅទីក្រុងប៉ារីស ប្រទេសបារាំង មានប្រសាសន៍បញ្ជាក់ប្រាប់វិទ្យុអាស៊ីសេរីថា ប្រទេសថៃឬសៀមមានកំណើតលើដែនដីសព្វថ្ងៃនេះគឺចាប់ពីសតវត្សរ៍ទី ១៣ក្រោយមក។
សូមរំឭកជូនផងដែរថា មិនតែប៉ុណ្ណោះកាលពីថ្ងៃទី១៥ ខែមិថុនា ឆ្នាំ១៩៦២ តុលាការអន្តរជាតិក្រុងឡាអេ នៅប្រទេសហុល្លង់ បានប្រកាសជាផ្លូវការទទួលស្គាល់ជាថ្មីថា ប្រាសាទព្រះវិហារនិងបរិវេណប្រាសាទជាកម្មសិទ្ធិផ្តាច់មុខរបស់ ព្រះរាជាណាចក្រកម្ពុជា គឺប្រកាសក្នុងគ្រាដែលឲ្យខ្មែរឈ្នះក្តីលើភាគីប្រទេសថៃ៕
From:
No comments:
Post a Comment